O deputado do BNG no Congreso, Néstor Rego, mantivo un encontro con representantes do sector pesqueiro do Morrazo en Bueu, no que tamén estiveron presentes outros representantes do Bloque, para poñer en común as necesidades principais do colectivo e tratar as iniciativas que os nacionalistas levaron ás diferentes institucións en defensa dos intereses do sector pesqueiro.

Entre estas propostas, destacan especialmente a reclamación da baixada do IVE/IVE aplicable aos produtos pesqueiros ata o tipo superreducido do 4 % que debería aplicarse ao peixe e marisco como produtos de primeira necesidade.

Tamén analizaron outras iniciativas como a referida ao Regulamento Europeo de Control Pesqueiro, que afectaba moi negativamente ás embarcacións artesanais de baixura e que xa foi modificado grazas, en parte, ao rexeitamento social.

Rego urxe tamén transferir a xestión dos fondos pesqueiros á Xunta e programar plans de soporte económico e social para o sector e as zonas máis afectadas polo acordo entre a Unión Europea e o Reino Unido. 

"Galiza non pode seguir soportando acordos e normativas que procedentes da Unión Europea, do Goberno do Estado e tamén do galego, abocan á desaparición paulatina dunha das principais frotas europeas. O BNG seguirá loitando e apoiando ao sector nas súas reclamacións dirixidas tanto á Xunta de Galiza como ao Goberno do Estado para que actúen na defensa da frota pesqueira galega que proporciona miles de postos de traballo directos e indirectos e que é sostíbel", subliña o deputado nacionalista.