Veciños de Santomé reclaman a restauración do lavadoiro de Troncosa
Por Redacción
A obras no ámbito do lavadoiro de Troncosa, en Marín, non deixaron satisfeitos os veciños de Santomé.
Varios deles uníronse para reclamar a restauración total da instalación, pois entenden que "en lugar de rehabilitar o lavadoiro para uso da veciñanza déixano en peor situación que antes do seu inicio".
Os veciños quéixanse de que "o único que se fixo foi aumentar a altura do chan que rodea as lousas", dentro duns traballos que se centran en mellorar os arredores: "o resto do lavadoiro non se lle vai tocar: non se vai reconstruir a canle, a cuberta que está totalmente deteriorada e non se vai adecentar a zona de lavar".
O lavadoiro de Troncosa e a estrada que pasa por enriba do río resultaron danados nas inundacións sufridas en 2006. Concretamente, segundo os veciños, "a canle que levaba a auga foi destruída pola riada e as pedras arratradas pola corrente obstaculizaron a ponte que atravesa a estrada".
Na súa reclamación este grupo de habitantes de Santomé pon como exemplo as actuacións que se levaron a cabo noutras instalacións similares como a de Caledra, Esperela ou Pardavila.