Sanxenxo sopesa subir o recibo da auga para facer viable a xestión do servizo
Por Oskar Viéitez
O goberno local do Concello de Sanxenxo levará a Pleno o Estudo de viabilidade económico financeiro que marca os parámetros para licitar a xestión do servizo de augas por 25 anos, o mesmo tempo que estivo como adxudicataria a empresa Espina y Delfín.
O Concello espera que a nova concesión permita modernizar a rede de auga e saneamento porque a empresa gañadora do concurso deberá asumir investimentos valorados en 11,6 millóns de euros.
Para facer viable a xestión do servizo e os investimentos o estudo contempla unha subida máxima do 19%, cifra que poderá rebaixarse xa que a puntuación do concurso público valorará especialmente dous aspectos, a redución da tarifa e o incremento dos investimentos.
O estudo propón a incorporación ao recibo trimestral dunha cota fixa de mantemento do contador 2,58 euros/trimestre (0,86 euros/mes). Sanxenxo é o único concello da súa contorna que carece desta cota.
O histórico de consumo de auga das vivendas e actividades comerciais concéntrase en 3 tramos: O primeiro, ata 30 metros cúbicos/trimestre é o consumo do 85% de vivendas e actividades comerciais. O segundo tramo, de 30 – 45 m3/trimestre é o consumo do 10% de vivendas e 9% de actividades comerciais. E, por último, o terceiro tramo é para consumos de máis de 45 m3/trimestre correspondente ao 5% de vivendas e 6% de actividades comerciais.
Nunha comparativa facilitada polo Concello de Sanxenxo detállase que o recibo trimestral de auga, rede de sumidoiros e depuración deste primeiro tramo de consumo (que afecta ao 85% de vivendas e actividades comerciais) é a día de hoxe de 26,25 euros e pasará a ser de 28,83 euros, mentres que en Poio este recibo é de 43,98 euros, en Cambados de 39,63 euros e en Pontevedra de 31,92 euros.
Os 2,58 euros de aumento trimestral que contempla o estudo no tramo 1 (ata 30 m3/trimestre) desagréganse: 2,58 euros da cota fixa do contador. A cota de auga baixa de 13,26 a 12,57 euros/trimestre. A cota de rede de sumidoiros baixa de 3,90 a 2,52 euros/trimestre. A cota de depuración sobe de 9,09 euros a 11,16 euros/trimestre.
En canto ao tramo 2, consumo de 30 a 45 m3/trimestre (10% das vivendas e o 9% das actividades comerciais), o recibo increméntase 8,84 euros ao trimestre, pasando dos 32,85 euros actuais a 41,67 euros. Por baixo de Poio (52,38 euros) e lixeiramente superior a Cambados (39,63 euros) e Pontevedra (39,25 euros).
As vivendas onde convivan máis de 4 veciños benefícianse aplicando a tarifa do tramo anterior, se o seu consumo equivale ao tramo 2, aplícaselle o tramo1 e o tramo 2 cando o seu consumo sexa do tramo 3.
Tramo 3, consumo de 45 m3/trimestre en diante (5% de vivendas e 6% de actividades comerciais) o recibo pasa de 43,62 euros a 51,60 euros o que supón un incremento trimestral de 7,98 euros. Segue sendo inferior a Poio (57,48 euros) practicamente igual que Pontevedra (50,88 euros) e superior a Cambados (39,63 euros).
CONSUMO INDUSTRIAL
No caso das industrias o estudo contempla 2 tramos: Tramo 0 a 75 m3 o recibo sobe 22,02 euros ao trimestre, pasa de 72,03 a 94,05 euros, por baixo de Poio (256 euros) e Cambados (169,77 euros) e superior a Pontevedra (75,27 euros).
O tramo de máis de 75 m3 o recibo sobe 62,49 euros ao trimestre, de 146,25 euros a 208,71 euros, por baixo de Poio (294,45 euros) e superior a Cambados (190,95 euros) e Pontevedra (168,33 euros).
Por último, o Goberno local reitera que as tarifas dos tres tramos de consumo das vivendas e as actividades comerciais e os dous tramos das industrias poderán ser reducidas nas ofertas que presenten as empresas xa que será un dos criterios de puntuación do concurso público.