Cuntis poderá usar a casa reitoral de San Fiz de Estacas para actividades culturais
Por Redacción
A casa reitoral de San Fiz de Estacas acollerá actividades diversas actividades municipais tras o acordo alcanzado entre o Concello de Cuntis e o Arcebispado de Santiago.
A través do convenio asinado entre ambas partes, o Concello poderá desenvolver nesta contorna privilexiada actividades como visitas, eventos lúdicos e de carácter cultural, así como todo tipo de iniciativas de promoción turística ou de fomento de emprego.
Será responsabilidade da administración municipal dispor os medios materiais e persoais necesarios para o desenvolvemento das actividades que contempla o documento.
Así mesmo, o Concello comprométese a respectar os valores culturais e patrimoniais do conxunto e a levar a cabo as tarefas de conservación que sexan necesarias para o desenvolvemento das diferentes actividades e nomeadamente aquelas relacionadas coa limpeza e a roza da parcela para mantela en óptimas condicións.
O alcalde, Manuel Campos, mostrouse "moi satisfeito" coa sinatura deste convenio e salientou que suporá un "impulso importantísimo" para o desenvolvemento cultural e turístico de Cuntis, ao empregar este "espazo bucólico" como contedor de actividades lúdicas e culturais.
O de San Fiz de Estacas é un importante conxunto artístico composto dunha igrexa, vía crucis, unha casa reitoral e un gran hórreo, rodeado dun fermoso marco natural.
As súas orixes remóntanse ao século XVI e aseméllase a outros conxuntos históricos doutras comarcas de Galicia que reflicten a economía feudal da época e o gran poder eclesiástico existente no momento da súa construción.
A casa reitoral atópase nun estado de conservación moi decente e é o hórreo outro dos elementos máis destacables, contando con oito pares de columnas apoiadas en grosos muros que serven para elevar o hórreo, que ten uns quince metros, e salvar o desnivel do terreo.
En fronte á reitoral está a igrexa de San Fins, que ten unha típica estrutura de igrexa barroca galega coa súa simple fachada e a súa torre á dereita rematada en campanario.
Relacionadas:
-
A reitoral de Estacas abrirase ás visitas dos cuntienses en marzo
Por Redacción |
-
Cuntis programa andainas, concertos e un programa de voluntariado para iniciar o verán
Por Redacción |
-
O Concello de Cuntis e Cucova asinan un convenio para reactivar o comercio local
Por Redacción |
-
Cuntis mellorará a sinalización e a información dos recursos turísticos de carácter relixioso
Por Redacción |