Sanxenxo duplicou a cifra de recollida de envases lixeiros marcada pola campaña "Recicla. Únete ao reto" levada a cabo pola Consellería de Medio Ambiente en colaboración con Ecoembes. 

A iniciativa á que se adheriron 15 concellos expuña un reto: Incrementar un 10% a recollida de envases no contedor amarelo, durante os meses febreiro, marzo e abril, respecto ao mesmo período de 2020.

O alcalde de Sanxenxo, Telmo Martín, xunto á conselleira de Medio Ambiente, Angeles Vázquez, e o delegado de Ecoembes en Galicia, Bruno de Llano, presidiron este venres a entrega de premios que tivo lugar na Sala Nauta e á que acudiron representantes dos outros oito concellos que lograron superar o reto de reciclaxe. Arteixo, Lalín, Ourense, Ponteareas, Porriño, Ribeira, Tui e Viveiro xunto a Sanxenxo recolleron o cheque de 2.000 euros que destinarán a unha causa social.

Sanxenxo entregará nos próximos días o premio a Cáritas recoñecendo "o gran esforzo" que realiza a organización e o "papel tan importante" que desempeña o colectivo.

O cheque foi recollido polo concelleiro de Medio Ambiente, Juan Deza, que destacou o "papel decisivo dos veciños" na consecución do reto.

Durante o acto, Telmo Martín sinalou que a protección da contorna "tan privilexiada é unha prioridade" e potenciar a economía circular é o obxectivo para seguir mellorando as cifras de reciclaxe no municipio. "Debemos coidar o noso patrimonio natural coa reducción de residuos e cun tratamento axeitado", apuntou.

Sanxenxo leva apostando nos últimos anos pola illas de contedores con ata catro fraccións co obxectivo de facilitar aos veciños a separación dos residuos tanto na vilas de Portonovo como Sanxenxo.