Acusan dous mozos dun delito de tráfico por tirar colectores á estrada na zona do Burgo
Por Natalia Puga
Eran as 5.00 horas da madrugada cando un forte ruído sorprendeu os veciños da zona do Burgo. Dous mozos avanzaban dende a ponte do Burgo e a avenida da Coruña cara a Juan Bautista Andrade e ao seu paso ían tirando os colectores. A actitude é propia dun acto vandálico, pero neste caso podía ter consecuencias moi graves, pois é unha zona de pouca visibilidade e algúns dos colectores obstaculizaban totalmente a circulación. A Policía Local rematou denuciándoos como presuntos autores dun delito contra a seguridade viaria.
A Policía Local de Pontevedra indicou que os feitos aconteceron na madrugada do sábado e que tiveron constancia do que sucedía a través dunha chamada dun particular ao 091. A persoa que denunciou a situación explicou que había varios colectores tirados na calzada na avenida da Coruña e que os responsables eran un rapaz vestido cunha camisa de cor vermella e outro con roupa escura.
Unha patrulla da Policía Local acudiu ao lugar e comprobou que había colectores obstaculizando a circulación de vehículos e provocando un grave risco para os coches. Algúns dos colectores cortaban por completo a estrada ao tráfico rodado e estaban en zonas de escasa visibilidade.
Nas inmediacións localizaron dous rapaces que respondían á descrición física achegada pola persoa que denunciou os feitos e lles deron o alto. Un deles foi trasladado á Xefatura da Policía Local, pero o outro non levaba enriba a súa documentación, de modo que quedou a disposición da Policía Nacional, que lle levou á Comisaría para poder identificalo.
Os dous supostos vándalos resultaron ser dous rapaces de 22 e 23 anos e finalmente os dous remataron nas dependencias da Policía Local imputados por un delito contra a seguridade vial na súa modalidade de actuacións que orixinan un grave risco para a circulación por colocar na vía obstáculos imprevisibles. Por estes feitos instruíronse dilixencias ante o Xulgado de Garda.