Xa funciona o segundo centro de compostaxe comunitario da parroquia de San Salvador
Por Redacción
A tenente de alcalde do Concello de Poio e responsable da área de Obras e Servizos Municipais, Chelo Besada, visitou este martes o centro de compostaxe comunitario situado na Rúa Valiña, que acaba de entrar en funcionamento.
Deste xeito, o núcleo da parroquia de San Salvador xa conta con dous dispositivos destas características, logo da inauguración do situado en Ferreirós, que leva operativo desde outubro do 2020 e que recentemente foi ampliado, dada a gran resposta no seu uso por parte da veciñanza.
A concelleira do PSdeG-PSOE, que estivo acompañada polo titular de Urbanismo, Gregorio Agís, comprobou que durante esta primeira xornada de actividade o composteiro xa recibiu aos primeiros usuarios. Tamén foron varias as persoas que se achegaron ata a zona para solicitar información á mestra composteira. A cada un deles entregóuselles folletos informativos, ademais dunha bolsa ecolóxica como agasallo.
A maiores, habilitáronse uns paneis, cedidos pola Deputación de Pontevedra, a través dos cales se recollen os pasos a seguir para levar a cabo o proceso de compostaxe de xeito correcto, ademais das súas vantaxes e beneficios. Precisamente, esta iniciativa é unha realidade grazas á adhesión do Concello ao Plan Revitaliza, impulsado desde a máxima institución provincial.
Por outra banda, a tenente de alcalde socialista anunciou que esta mesma semana tamén pasará a estar operativo outro composteiro comunitario en San Salvador, concretamente na rúa Río Miño. A concelleira de Obras e Servizos incidiu en que a dotación destes composteiros comunitarios vén dada "pola gran resposta da cidadanía á hora de facer uso destas instalacións, o que fala ás claras do seu interese e compromiso co medio ambiente".
Besada tamén recorda que o Concello pon a disposición de todas as persoas interesadas sacos de compost. Darase prioridade aos xa están rexistrados como usuarios do compost comunitario, pero a oferta esténdese á veciñanza de todas as parroquias do municipio.
Para dispor del, basta con poñerse en contacto telefónico coa mestra composteira, a través do número de teléfono 604025288, en horario de 8.30 a 14.30 horas.
O obxectivo da Concellería de Obras e Servizos é continuar implantando e fomentando esta práctica en todo o territorio municipal. Para iso tamén se destinarán 100.000 euros na compra de composteiros individuais, a través do remanente de tesourería correspondente ao ano 2020.
Relacionadas:
-
En trámite a adquisición de 700 composteiros individuais para repartir de xeito gratuíto entre a veciñanza de Poio
Por Redacción |
-
Ludotecas e campamentos de verán volverán xogar e aprender coa compostaxe
Por Redacción |
-
Escolares do CEIP Lourido descobren os segredos do funcionamento do composteiro comunitario
Por Redacción |
-
Poio entrega un composteiro á residencia Ballesol
Por Redacción |
-
O Concello de Poio mercará un milleiro de composteiros individuais
Por Redacción |
-
O alumnado de Poio aprende como o lixo orgánico se converte en compost
Por Redacción |
-
Poio amplía o composteiro de Ferreirós e colocará novos en San Salvador
Por Redacción |
-
Novas sesións sobre compostaxe nos centros educativos
Por Redacción |