Indemnizan un pontevedrés ao que Ryanair cancelou un voo por unha folga
Por Alejandro Espiño
O xulgado do mercantil número 1 de Pontevedra condenou á compañía Ryanair a indemnizar con 250 euros a un pasaxeiro ao que lle cancelaron un voo, sen darlle ningún tipo de alternativa como marca a lei, debido a unha folga convocada polos tripulantes de cabina.
O afectado, un pontevedrés que tiña previsto viaxar entre as cidades italianas de Brindisi e Bérgamo en xullo de 2018, foi informado da cancelación o mesmo día do voo.
A normativa esixe, segundo lembra o xuíz na súa sentenza, que para non verse obrigadas a pagar unha compensación aos pasaxeiros afectados, as aeroliñas deben informar da cancelación da viaxe con, polo menos, sete días de antelación.
En caso de non facelo, deben ofrecer aos pasaxeiros tomar outro voo que lles permita saír con non máis dunha hora de antelación con respecto á hora de saída prevista e chegar ao seu destino final con menos de dúas horas de atraso con respecto á hora inicial de chegada.
Ryanair, apunta o maxistrado, non fixo ningunha das dúas cousas polo que deberá compensar ao demandante con 250 euros, que é a cantidade que establece o Regulamento 261/2004 para distancias de voo inferiores a 1.500 quilómetros.
A sentenza, contra a que non cabe interpoñer recurso, subliña que unha folga de traballadores "non se dá espontaneamente e sen aviso previo", senón que se trata dun evento cuxa celebración "se anuncia con certa antelación".
Por iso, en base a un fallo recente do Tribunal de Xustiza da Unión Europea, difundido o pasado mes de marzo, unha folga "non pode exonerar á empresa de ningunha responsabilidade", sinala o xuíz de Pontevedra.
O titular do xulgado do mercantil número 1 de Pontevedra advirte ademais que, a partir de agora, neste tipo de casos valorará a posibilidade de facer unha "especial declaración de temeridade" a efectos do pago das costas xudiciais deste tipo de procesos.