Os novos contaxios por covid na área sanitaria dispáranse ata os 40 e os casos activos soben a 357
Por Diego Espiño
A curva de afectación polo coronavirus na Área Sanitaria de Pontevedra e O Salnés segue á alza este martes 13 de abril, segundo reflicte a actualización de datos ofrecida ás 10.00 horas polo Servizo Galego de Saúde.
Dese balance despréndese que nas últimas horas detectáronse 40 novos contaxios na área pontevedresa, o que unido a que só se produciron 10 altas epidemiolóxicas fixo subir de maneira importante a cifra de casos activos ata os 357, é dicir, 30 máis que o luns.
Outro indicador que se incrementa é a cifra de hospitalizacións, con tres persoas máis ingresadas nunha planta hospitalaria. Son en total 21 pacientes repartidos entre o Complexo Hospitalario Universitario de Pontevedra (19) e o Hospital do Salnés (2), aos que se suman os 3 afectados que evolucionan na Unidade de Coidados Intensivos de Montecelo, os mesmos que 24 horas antes.
Desde o inicio da pandemia superaron a covid 12.563 na área sanitaria, rexistrándose 168 falecementos de persoas con positivo activo.
En canto a realización de test, as probas realizadas han baixado notablemente con 384 PCR, que se suman ás 192.063 efectuadas con anterioridade.
DATOS DE GALICIA
A nivel autonómico este martes 13 de abril na comunidade hai 2.382 casos activos, o que supón 66 máis. Deles 615 son da área da Coruña (-1), 169 da de Lugo (+12), 185 da de Ourense (-1), 357 da de Pontevedra, 604 da área de Vigo (+5), 367 da de Santiago (+12) e 85 da de Ferrol (+9).
De total de persoas infectadas, 29 están na UCI (un menos) e 156 en unidades de hospitalización (un máis). Ata a data en Galicia rexistráronse 2.369 falecementos asociados ao virus, tras sumar un nas últimas horas.
Relacionadas:
-
A UCI de Montecelo suma un cuarto paciente positivo en covid, con 375 casos activos na área sanitaria
Por Diego Espiño |
-
Dous hospitalizados máis por covid na área sanitaria, que conta con 366 casos activos
Por Diego Espiño |
-
A semana iníciase na área sanitaria con 30 novos contaxios de covid e 327 casos activos
Por Diego Espiño |
-
Detectados 24 novos contaxios de covid nunha xornada con máis dun milleiro de probas PCR realizadas
Por Diego Espiño |
-
A área sanitaria volve superar os 300 casos activos de covid case un mes despois
Por Diego Espiño |
-
O nivel máximo de alerta mantense no Grove e seis concellos da área sanitaria soben ao nivel medio
Por Redacción |
-
Os casos activos por covid-19 sitúanse en 289, tras rexistrarse 28 novos contaxios
Por Alejandro Espiño |