Os consumos de auga e lixo confirman o tirón de Sanxenxo a pesar das restricións
Por Redacción
Pese ao nivel alto de restricións co que Sanxenxo viviu esta semana Santa, os datos rexistrados de lixo xerado e consumo auga indican que o municipio mantivo o seu tirón turístico.
Tomando como referencia os catro días forte da celebración (xoves venres, sábado e domingo), a concesionaria do lixo recolleu 117.390 quilos fronte aos 102.780 recollidos os mesmos días da semana anterior, un 14,21% máis que nas xornadas nas que xa Sanxenxo atopábase en nivel alto de restricións. En canto ao consumo de auga, o incremento foi menor, dun 6,40%, ao pasar dos 18.899 metros cúbicos aos 20.107 do mesmo período.
A recadación rexistrada no aparcamento público de Nauta referenda os datos de consumo. Así, de luns a domingo desta semana Santa facturáronse 6.954 euros no estacionamento municipal fronte aos 3.569 rexistrados na semana anterior. O sábado foi o día de maior facturación con 1.780 euros seguido do domingo con 1.312 euros.
Sanxenxo que conta con máis de 6.000 vivendas de segunda residencia de galegos e unha ampla rede de aloxamentos hostaleiros que se reduciu, polas actuais circunstancias sanitarias, a 1.500 prazas e de vivendas turísticas, tamén mermadas ao 50%, logrou atraer aos seus visitantes máis fieis e de proximidade a gozar da Semana Santa.
BO COMPORTAMENTO, "A TÓNICA XERAL"
En canto ás actuacións realizadas pola Policía Local para o control e vixilancia de espazos públicos e terrazas, o goberno local destaca o bo comportamento como "a tónica xeral" deste período festivo. Os axentes tramitaron un total de 31 denuncias por máscara, 9 por desacato á autoridade e 12 de tráfico.
O goberno local destaca "a profesionalidade" do sector hostaleiro que, a pesar das circunstancias e restricións, mantiveron baixo control os aforos e medidas dos seus negocios, salvo algunha excepción que, en ningún caso, marca a regra.
A Policía Local mantivo a vixilancia por terra e por aire cos catro drons adquiridos o verán pasado para o control de aforos en praias e que agora se incorpora aos operativos de vixilancia rutineiros de terrazas e espazos públicos facilitando e axilizando o labor policial.
Relacionadas:
-
'Está en tu mano, cierra el grifo cuando toca', a campaña de Sanxenxo para anticiparse á seca estival
Por Redacción |
-
O aparcadoiro do porto deportivo rexistra a maior facturación no mes de maio da súa historia
Por Redacción |
-
A nova concesionaria do ciclo da auga de Sanxenxo terá que destinar 11,6 millóns de euros a modernizar a rede
Por Redacción |
-
Sanxenxo, con só unha cuarta parte dos seus hoteis abertos, pecha a Semana Santa cun 51% de ocupación
Por Redacción |
-
A Policía Local de Sanxenxo incorpora drons para controlar as restricións derivadas da covid-19
Por Redacción |
-
A palabra 'Sanxenso' axuda á Policía Local a detectar o xustificante falso dun logróñés que estaba de vacacións en Raxó
Por Anxo Lourido |