8M | A Subdelegación do Goberno homenaxea cun vídeo ás mulleres en primeira liña da pandemia
Por María José Pita
A subdelegada do Goberno en Pontevedra, Maica Larriba, presentou este luns o vídeo que o seu departamento realizou con motivo do Día Internacional da Muller.
Na súa intervención, a subdelegada insistía en que esta iniciativa, encadrada no 8M, é tanto unha homenaxe ás traballadoras de sectores esenciais durante a pandemia, e que se atopan moi feminizados como o sanitario, social e de servizos, como unha reivindicación da corresponsabilidade nos coidados, que seguen sendo maioritariamente femininos.
Maica Larriba explicaba por que é oportuno este vídeo, xa que trata de "expoñer a situación de dureza de todas as mulleres que traballaron en primeira liña nos centros sanitarios, nos servizos de axuda no fogar dos concellos, as profesionais dos Centros de Información á Muller e as profesionais dos servizos sociais municipais" así como "o incuestionable labor de todas as mulleres que compatibilizaron os seus traballos en casa co teletraballo, coa atención os fillos e as fillas en idade escolar ou as persoas maiores dependentes, moitas veces duplicando e triplicando a súa carga de traballo".
Larriba tamén lembrou ás mulleres do ámbito rural e aquelas que traballan no sector servizos e que a pandemia lles impediu poder conciliar, obrigándoas en moitos casos a renunciar ao seu emprego.
Este vídeo ofrece os testemuños de "homes e mulleres da provincia que desde as súas responsabilidades contribuíron a romper ese teito de cristal e un traballo que redunda en dignificar a igualdade entre homes e mulleres", puntualizaba a subdelegada.
Ademais de Maica Larriba García, a subdelegada do Goberno en Pontevedra, interveñen coas súas reflexións neste vídeo: Estíbaliz Palma Varona, comisaria xefa provincial do Corpo Nacional de Policía; Belén Rubido De la Torre, xuíza decana de Pontevedra especializada en Violencia de Xénero; Marta Estrada Ibars, directora provincial do SEPE; María Teresa Delgado Pérez, directora do Centro Penal da Lama; Emma Torres Romay, decana da Facultade de Ciencias Sociais e da Comunicación da Universidade de Vigo; Águeda Gómez Suárez, responsable da Unidade de Igualdade da Universidade de Vigo; José Ángel Ruibal Pérez, inspector principal responsable do grupo de VioXén da Policía Local de Pontevedra; Elena Molanes Piñeiro, directora do Centro de Emerxencias de Vigo para mulleres vítimas de violencia de xénero; Verónica Marcos Lanzo, presidenta da Federación de Asociacións de Mulleres Rurais de Galicia; Montserrat González García, presidenta da Asociación de CIMs de Galicia; Carolina Pousada González e Miguel Ángel Rodríguez Fernández, docentes do Ciclo Superior en Igualdade de Xénero do CIFP A Xunqueira de Pontevedra.
Relacionadas:
-
8M | As columnas feministas percorren Vilaboa por máis dereitos para as coidadoras
Por Redacción |
-
8M | O feminismo está "farto" e non hai pandemia que o pare
Por Manu Otero & Cristina Saiz |
-
8M | Carmela Silva: "O feminismo é inquebrantable e non imos dar nin un paso atrás"
Por Redacción |
-
8M | A Xunta defende en Pontevedra o seu compromiso "irrenunciable" coa igualdade
Por Redacción |
-
O 8M, Día da Muller, xa é visible no balcón da Subdelegación
Por Redacción |
-
25N | Maica Larriba pide condenar actitudes, prácticas e condutas que consenten a violencia á muller
Por Redacción |