Cada día a "policía de balcón" denuncia seis infraccións en Pontevedra
Por Oskar Viéitez
Os pontevedreses están máis alerta que nunca segundo revela o balance de comunicacións do pasado ano feito pola Policía Local de Pontevedra. Coa pandemia, estes veciños que vixían o cumprimento da legalidade foron bautizados como "policía de balcón", mesmo "shériff da escaleira".
A central da Xefatura local recibiu o pasado ano máis de 2.300 chamadas destes veciños vixiantes. De media son unhas seis chamadas cada día alertando de bares abertos, cidadáns sen máscara, botellóns, incumprimentos do toque de queda, entre outras denuncias.
O 70% das chamadas recibidas o pasado ano no 092 tiñan relación coa pandemia.
A central da Policía Local recibiu o pasado ano 34.682 chamadas, o que supón un incremento dun 6% respecto ao ano anterior.
Destas 24.187 foron comunicacións entre os propios axentes municipais, 386 avisos foron de emerxencias e 3.214 de tráfico.