A covid-19 deixa 88 contaxios máis na área sanitaria e 14 pacientes na UCI de Montecelo
Por Oskar Viéitez
Este mércores 20 de xaneiro a Xerencia da área sanitaria de Pontevedra-O Salnés informa de 88 novos contaxios de covid-19 nas últimas 24 horas. Hai 1.195 casos activos, son 50 máis que onte martes.
A día de hoxe mantéñense 62 pacientes de coronavirus ingresados en planta de hospitalización. Concretamente hai 49 persoas no Complexo Hospitalario Universitario de Pontevedra, 4 no QuirónSalud Miguel Domínguez e 9 no Hospital do Salnés.
Aumenta a presión na Unidade de Coidados Intesivos e xa son 14 os pacientes críticos de covid ingresados na UCI do Hospital Montecelo.
Así mesmo, permanecen 1.119 casos evolucionando nos seus domicilio cunha sintomatoloxía máis leve.
Desde o inicio do plan de continxencia pola pandemia curáronse 7.031 pacientes (38 máis que no día de onte) e faleceron por este virus na área sanitaria 92 pacientes.
En canto a realización de PCR, nas últimas 24 horas fixéronse 1.122 probas, que se engaden ás 127.167 xa efectuadas desde o inicio da pandemia na área sanitaria de Pontevedra-O Salnés.
GALICIA
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 14.975, deles 3.839 son da área da Coruña, 1.273 da de Lugo, 2.107 da de Ourense, 1.195 da de Pontevedra, 2.776 da área de Vigo, 2.593, da de Santiago e 1.192 da de Ferrol.
Do total de pacientes positivos, 132 están en UCI, 696 en unidades de hospitalización e 14.147 no domicilio. Polo de agora, en Galicia hai un total de 63.317 persoas curadas, rexistrándose 1.550 falecementos.
O número de PCR realizadas é de 1.272.189. O número de doses de vacina contra a covid-19 administradas é de 59.124.