Un incendio queima media hectárea de arborado en Samieira
Por Redacción
Un incendio forestal arrasou este venres máis de media hectárea de superficie arborada do Concello de Poio. Permanece controlado, aínda que non extinguido, dende as 15.14 horas e xerou grande expectación entre veciños e condutores.
Segundo informou a Consellería do Medio Rural e do Mar, o lume comezou na parroquia de Samieira ás 13.07 horas e quedou controlado ás 15.14 horas. Durante as pouco máis de dúas horas que permaneceu sen control arrasou unha superficie aproximada de 0,59 hectareas.
Para o seu control e extinción, a Xunta mobilizou ata Samieira a dous axentes forestais, seis brigadas, catro motobombas, tres avións e dous helicópteros.
Ademais, ás 15.55 horas deuse por extinguido o lume que afectaba dende o xoves á parroquia de Anceu, en Ponte Caldelas, e obrigara activar o nivel de alerta 1 como medida preventiva pola proximidade ao núcleo de Esfarrapada. A última extimación de Medio Rural cifra a superficie queimada en 12,4 hectáreas, das cales 11 son arboradas e 1,4 de monte raso. Nas labores de extinción participaron un técnico, sete axentes forestais, dez brigadas, dez motobombas, dúas pas, oito avións e dous helicópteros.