Solicitan reforzos de persoal de limpeza no Complexo Hospitalario de Pontevedra para afrontar as dificultades que provoca a pandemia
Por Redacción
A representación dos sindicatos UGT e CIG nos Hospitais Provincial e Montecelo do Complexo Hospitalario Universitario de Pontevedra reclaman reforzos de persoal de limpeza para poder desenvolver con garantías o traballo diario nestas instalacións debido aos protocolos adoptados pola covid-19.
Sinalan que sofren unha carga de traballo diaria debido á insuficiencia de persoal nestes servizos. Esta necesidade foi trasladada á empresa ACCIONA, adxudicataria da limpeza nos centros hospitalarios. Desde a empresa indícaselles que xa se atopan operativos os traballadores que lle esixe o SERGAS e que nalgúns casos mesmo se reforza con máis persoal do esixido desde a Consellería de Sanidade.
A representación sindical presentaba o 4 de decembro un escrito dirixido á Xerencia do Complexo Hospitalario para alertar da necesidade de que se aumentasen os reforzos de persoal nas plantas. Segundo os sindicatos acompañábase o escrito cun informe detallado dos reforzos necesarios e solicitábase a ampliación de persoal ata que se realice un novo concurso de adxudicación do servizo.
Solicitaron un protocolo de actuación nos casos de covid para manter unha actuación pautada sen que obtivesen resposta sobre as accións que deben manter en materia de hixiene e de control de residuos perigosos.
Lembran que desde 2002 non se realizou ningunha ampliación de persoal no servizo de limpeza malia producirse a pandemia e outras enfermidades infecto contaxiosas como a gripe A. Entenden que é necesario este incremento de traballadores para contribuír a reducir os efectos da pandemia.
Tamén solicitan un plus de perigo para o persoal de limpeza ao atoparse diariamente manipulando e transportando residuos perigosos contaminados polo virus.
Relacionadas:
-
"Por un convenio digno. Acciona negocia xa!", clama o persoal de limpeza de Montecelo e o Provincial
Por María José Pita |
-
Limpadores ao límite: "en Montecelo dúas persoas de noite fan todo, quirófanos, covid, todo"
Por María José Pita |
-
O número de mortes en Galicia por covid este luns é de 12 persoas, unha delas na súa vivenda en Pontevedra
Por Anxo Lourido & Cristina Saiz |
-
Reclaman o plus de perigosidade para o persoal de limpeza do Hospital Provincial e Montecelo
Por Anxo Lourido |
-
CC.OO. denuncia que a empresa rexeita pagar perigosidade ao persoal de limpeza nos hospitais públicos en plena pandemia
Por Redacción |
-
Os sindicatos, contra a xerencia da área sanitaria: "Se tiveran un mínimo de vergoña, dimitirían"
Por Redacción |