Detido por trapicheo de drogas un veciño de Marín con antecedentes
Por Redacción
Axentes da Policía Nacional da Comisaría de Marín detiveron, como presunto autor dun delito contra a saúde pública, un home de 44 anos de idade con antecedentes policiais por tráfico de estupefacientes.
Durante un dispositivo de prevención do tráfico polo miúdo de substancias estupefacientes os axentes observaron a actitude sospeitosa dun individuo no interior dun coche que trataba de evitar a presenza policial.
Os axentes achegáronse para identificar a este home, veciño de Marín, e ao rexistrar o vehículo atoparon ocultas entre o oco do asento do condutor e do freo de man sete papelinas de cocaína de 5,8 gramos de peso.
Ademais interviñéronlle varios cartuchos de caza do que o detido non mostrou ningún documento acreditativo e 170 euros en billetes pequenos.
A detención foi levada a cabo por integrantes do Grupo de Seguridade Cidadá.