José Eiras, o histórico alcalde socialista de Moraña, faleceu aos 82 anos de idade, segundo comunicou a agrupación do PSdeG-PSOE neste municipio pontevedrés.

Eiras, que era mestre de profesión, foi alcalde de Moraña durante 28 anos. Ocupou o cargo entre os anos 1983 e 2011, aínda que xa fora edil da corporación tras as primeiras eleccións democráticas en 1979.

Os socialistas de Moraña destacaron del que era un "gran compañeiro" e que sempre foi un político "comprometido co pobo" durante toda a súa vida.

Ademais, destacan o seu perfil "próximo" a todos os  morañeses e aseguran sentir "profundamente" o seu falecemento.

Durante os seus 28 anos como alcalde, José Eiras logrou transformar o municipio modernizando todos os seus servizos, ampliando a rede de saneamento ou impulsado o PXOM e os dous polígonos industriais de Moraña, entre outros logros.