Deteñen un presunto maltratador nun balcón cando intentaba fuxir da Policía
Por Natalia Puga
A Policía Nacional de Vilagarcía detivo na noite do luns un veciño da localidade arousana como suposto autor dun delito de malos tratos no ámbito familiar. O que se prevía como un arresto rutineiro a raíz da denuncia da presunta vítima converteuse en toda unha aventura máis propia dunha película. Cando viu que os policías se achegaban á súa casa, subiu ao cuarto piso, descolgouse polo balcón e tiveron que intervir policías e bombeiros para lograr detelo.
Fontes da Comisaría de Pontevedra indicaron que os feitos aconteceron arredor das 22.30 horas. Unha muller acudiu ás dependencias policiais e relatou que o seu marido levaba un tempo insultándoa e obrigándoa a realizar tarefas domésticas contra a súa vontade. Ademais, segundo ela, tamén insulta o seu fillo menor e dálle golpes e beliscos.
Estes supostos malos tratos prolónganse no tempo, pero o desencadeante que levou á muller a irse de casa e denunciar aconteceu o sábado día 7 de setembro. El supostamente deulle un golpe nas costas a ela en presenza do seu fillo. Ela sentiu medo e foise á casa dos seus pais.
A Policía constatou que o home xa tiña antecedentes por malos tratos. Tras recibir a denuncia, unha patrulla acudiu á casa do suposto maltratador na rúa Santa Eulalia de Vilagarcía. O home encontrábase na porta dun bar situado no baixo do edificio e, ao velos, subiu ao seu piso, situado na cuarta planta.
Segundo relata a Policía, o home lles preguntou que facían alí, rompeu a chorar, se mostrou moi alterado e lles dixo que "prefería morirse antes que irse detenido". Para fuxir dos axentes, saíu ao balcón e deslizouse ata o segundo piso. Xa alí, policías locais e nacionais entraron polo piso do veciño e os bombeiros levaron un camión grúa e subiron con el ata a súa altura, para intentar rescatalo, pero non foi posible.
O home negouse a baixar na cesta do camión grúa dos bombeiros e tamén a saír polo balcón da terraza do seu veciño do segundo, ata que finalmente un bombeiro se descolgou dende outra altura do edificio e entre todos lograron rescatalo e detelo, na propia terraza.
Tras a detención, o home foi trasladado nunha ambulancia do 061 ao Hospital do Salnés e permaneceu alí ata pasadas as 1.30 horas da madrugada. De alí foi derivado á Comisaría e, tras tomarlle declaración, deixárono en liberdade, pero cunha citación xudicial. Terá un xuízo rápido por violencia no ámbito familiar o próximo 24 de setembro.