Cinco dos sete detidos no marco da operación denominada "Guarloc", desenvolvida hai dous días en Pontevedra contra o menudeo de drogas, quedaron en liberdade con cargos tras declarar perante o xulgado de instrución número 2 de Pontevedra. Deberán presentarse no xulgado, iso sí, os días 1 e 15 de cada mes.

Os outros dous arrestados xa foran liberados tras comparecer en sede policial.

Todos eles son veciños de Pontevedra e, segundo as autoridades, algún deles conta con antecedentes policiais.

A investigación deste operativo conxunto entre a Garda Civil e a Policía Local comezou hai meses, tras detectarse a subministración de distintas substancias a toxicómanos veciños de Poio e Pontevedra. O dispositivo acelerouse tras a detención dunha persoa que portaba unha importante cantidade de doses de heroína dispostas para a súa venda.

Por mor desta detención precipitáronse os rexistros efectuados o pasado martes en cinco domicilios, todos eles dentro do termo municipal de Pontevedra, un en Salcedo, dous en Monte Porreiro, outro en Paseo de Colón e o último nun mesón da rúa Peregrina.

Nestes rexistros, os axentes incautaron 53,05 gramos de cocaína, un gramo de heroína, 178,4 gramos de haxix, 660 gramos de marihuana, 400 gramos de anfetaminas en po, 3.047 gramos de substancia de corte, seis básculas de precisión, nove armas brancas, unha pistola de aire comprimido, 19 móbiles e tres ordenadores portátiles, ademais de 16.600 euros.

Neste operativo participaron efectivos da Compañía da Garda Civil de Pontevedra, así como a Unidade de Seguridade Cidadá (USECIC) da Comandancia, o Servizo Cinolóxico e membros da Policía Local.