Atraco nun estanco en Marín: "Se gritas, dou a volta e clávote"
Por Natalia Puga
A Policía Nacional investiga un atraco rexistrado a mediodía do sábado en Marín no que o presunto ladrón ameazou a dependenta cun cuter ao berro de "se gritas, dou a volta e clávote" e levouse un botín duns 1.450 euros.
O estanco está situado na Rúa do Sol e o atraco produciuse contra a 14.00 horas do sábado 7 de setembro, nun momento en que a dependenta estaba soa no establecemento. Un cliente entrou e pediulle un paquete de tabaco, aínda que a súa intención non era comprar nada.
Segundo relatou máis tarde a dependenta á Policía, deuse a volta para recoller a mercadoría e, cando se xirou de novo para entregarlla, o individuo tiña un cuter na man e ameazouna para que lle entregase o diñeiro. "Dame os cartos ou clávote", díxolle.
A dependenta respondeulle que non tiña diñeiro, pero o home abriu a caixa rexistradora e colleu todo o diñeiro e fuxiu a pé a través das galerías comerciais situadas na beirarrúa de en fronte. Levouse 1.450 euros en billetes e moedas e tres paquetes de tabaco.