Íspese na praza de touros, insulta policías e voluntarios, resístese a saír do recinto e remata detido
Por Natalia Puga
Un veciño de Poio de 21 anos rematou detido o sábado durante o Torneo Medieval organizado no marco da Feira Franca. O arresto produciuse polos delitos de desobediencia e atentado á autoridade despois de que o mozo montase un balbordo no interior da praza de touros.
Segundo indicaron dende a Policía Nacional, o incidente se produciu entre as 20.00 e as 20.30 horas e comezou co detido supostamente insultando e faltando ao respecto a varias mulleres que se encontraban como público.
Os efectivos de Protección Civil chamáronlle a atención polo seu comportamento e, como reacción, ensinoulles os xenitais e comezou a insultar as voluntarias de Protección Civil, de modo que se requiriu a intervención da Policía Nacional.
Cando os axentes chegaron ao lugar, o mozo reaccionou de forma hostil. Ante o escándalo que estaba a xerar na praza, os policías decidiron o seu traslado ao exterior. Nese momento, resistiuse a ser levado ao exterior e chegou a suxeitarse a unha varanda para evadilo.
Finalmente, foi necesario o reforzo dos axentes da Policía Local para reducir o rapaz e lograr sacalo da praza. Xa no exterior, empezou a golpear a cabeza contra unha cartel publicitario, de modo que os policías tiveron que suxeitalo para que cesase na súa actitude.
O incidente tamén implicou tres familiares do rapaz, que intentaron interferir na súa detención. A súa irmá, a súa tía e o seu primo foron identificados e o rapaz rematou detido e trasladado á Comisaría.