Continúa a baixada paulatina de novos positivos e casos activos na maioría de municipios da área sanitaria
Por Redacción
Mantense un descenso gradual do número de novos casos positivos e de enfermos activos por covid-19 nos municipios da área sanitaria de Pontevedra e O Salnés.
Desta forma, o Concello de Pontevedra comunicou que este martes mantéñense 241 casos activos, cinco menos que hai 24 horas, con 1.497 contactos en seguimento.
En Marín, a situación que se traslada desde o Concello é que se produciu unha baixada de sete casos respecto ao luns, con 49 casos activos e 315 persoas que estiveron en contacto con positivos en seguimento.
Sanxenxo ofrece este martes 60 casos activos, catro menos que no último balance, con 274 persoas en seguimento. Tamén Vilagarcía ofrece unha cifra en descenso con 98 casos activos de covid-19, dúas persoas menos que no arranque de semana e con 423 contactos en seguimento, segundo os datos que lles traslada a Consellería de Sanidade. Pola súa banda, en Cambados tamén se rexistra unha baixada e actualmente hai 41 persoas contaxiadas na vila.
Os dous casos nos que se detectou un incremento son Poio, onde se contan 49 casos activos, un máis e 289 persoas en seguimento; e Vilanova de Arousa, onde tamén se localizou un contaxio nas últimas horas, despois de máis de dúas semanas sen contabilizar novos casos. Hai 11 persoas enfermas de coronavirus neste municipio.
Na área sanitaria de Pontevedra - O Salnés rexistráronse 41 novos casos por probas PCR, que establece unha porcentaxe de 15 por cada 100.000 habitantes. Este martes, ao tratarse dunha xornada festiva, non haberá reunión do comité clínico para analizar a evolución da covid-19, segundo informan desde a Consellería de Sanidade. Si está prevista a reunión para o vindeiro venres do subcomité no que se analizará de novo toda a situación e decidirase se hai cambios nas restricións establecidas nos Concellos da área sanitaria Pontevedra e O Salnés.