Unha de cada dúas mediacións da Policía Local entre particulares acaba en acordo amigable
Por Alejandro Espiño
O servizo de mediación de conflitos da Policía Local tiveron tan boa acollida que sorprendeu ata a quen o puxo en marcha. Así o destacaron a concelleira de Seguridade Cidadá, Carme da Silva, e o intendente xefe do corpo policial, Daniel Macenlle. Desde maio, data na que se puxo en marcha, interveuse en 28 conflitos particulares. De todos eles, 15 (o 54% do total) solucionáronse pola vía de acordo e diálogo.
Este grupo de mediación, composto por un inspector, un oficial e cinco axentes da Policía Local, ten como obxecto intentar resolver de forma amigable os problemas que poidan xurdir entre veciños ou familiares, "conflitos que poderían chegar a xudicializarse ou xerar graves problemas de convivencia entre particulares", destacou Carme da Silva. Recibe unha solicitude de mediación cada catro días, aproximadamente.
A solicitude de mediación pode partir dunha das partes implicadas no conflito ou ben ser ofrecida de oficio pola Policía Local tras decatarse do problema. En todo caso, ambas partes deben aceptar voluntariamente acollerse a esta solución. Segundo explicou Daniel Macenlle, "cando empezamos a traballar falamos coas partes, vemos cal é a súa posición ante o problema e imos achegando posturas ata que logramos un acordo".
En todo caso, "non hai un estándar de actuación", afirmou o intendente xefe da Policía Local. "Os mediadores tratan de fomentar a empatía entre ambas partes, porque na maioría dos casos todos teñen parte de razón, e amosamos as consecuencias para a convivencia que tería que o asunto chegara á vía do contencioso xudicial".
Os conflitos nos que actuou este servizo de mediación refírense no seu maior parte a problemas de propiedades, dereitos de paso, alugueres ou cuestións de convivencia tales como ruídos, roupa tendida ou molestias causadas por animais. Os asuntos máis complicados, sinalaron, son os relativos a mala relación entre veciños "porque moitos deles son problemas que veñen de moi atrás e están implicados familiares".
Ademais dos 15 casos resoltos, outros catro están "en trámites de resolverse". O resto, non tanto. En tres deles unha das partes non aceptou a mediación, en dous optouse finalmente pola vía xudicial e nos catro restantes esta mediación non é posible por diversas causas "ou ben porque xa hai algunha actuación xudicial ou porque hai aberto algún tipo de expediente", aclarou a concelleira nacionalista.
En todo caso, o balance non pode ser máis positivo. "Aspirábamos a chegar ao 30% dos casos resoltos en estamos case no 60", dixo Carme da Silva. Algo no que coincide Daniel Macenlle. "Estamos sorprendidos pola eficacia, pensamos que ía ser máis baixa por experiencias anteriores", asegurou. Algo que vencellou ao traballo dos membros do equipo, dos que encomiou "o seu papel, a súa implicación e o seu entusiasmo".