Entrégase o segundo mozo buscado pola agresión e atropelo dun carteiro en Sanxenxo
Por Natalia Puga
A Garda Civil detivo ao segundo dos dous mozos buscados por presuntamente ter dado unha malleira e atropelado a un carteiro en Sanxenxo a primeira hora da mañá do venres. Trátase do veciño de Marín M.G.C., de 24 anos.
O mozo presentouse no cuartel de Sanxenxo unha vez que a Garda Civil o tivo localizado e identificado. Coñecedor de que o estaban a buscar, acudiu voluntariamente, ao igual que fixera o martes o primeiro detido por estes feitos, o tamén veciño de Marín P.B.G.
Fontes da Garda Civil indicaron que unha vez que se lle tomou declaración no cuartel o mozo quedou en liberdade. Atribúeselle un delito de lesións dolosas polo que deberá comparecer ante o Xulgado de Instrución número 1 de Cambados, que instrúe as dilixencias, cando sexa requirido.
A agresión que se lles atribúe produciuse sobre as 8.35 horas do venres 30 de agosto na rúa Ramón Cabanillas de Sanxenxo e a suposta vítima é un funcionario de Correos veciños de Vilalonga de 43 anos que responde ás iniciais L.P.G.
A suposta vítima e permanece ingresado no hospital Domínguez de Pontevedra recuperándose das lesións graves sufridas, entre elas varias fracturas e policontusións, e pendente de ser intervido cirurxicamente.
Segundo transcendeu, o carteiro chamou a atención a un grupo de mozos que pola súa actitude supostamente vandálica. Tras este toque de atención, entrou na oficina de Correos e, cando saíu, os mozos estaban alí e iniciouse unha discusión que rematou con dous mozos supostamente dando unha brutal malleira ao seu opoñente. A continuación, subiron nun vehículo, atropelárono e fuxiron.