Convocan unha concentración diante do Hospital Provincial para pedir a dimisión da directiva da área sanitaria
Por Redacción
Os sindicatos da Xunta de Persoal do Complexo Hospitalario Universitario de Pontevedra, CIG, UXT, OMEGA, CSIF, CCOO, TSP e SATSE, concéntranse este xoves 12 de novembro ás 11.00 horas para reclamar a petición de dimisión da directiva da área sanitaria de Pontevedra - O Salnés.
Estas centrais xa solicitaran esta dimisión do equipo que dirixe o xerente José Ramón Gómez. Piden a marcha da xerencia, da dirección asistencial, da dirección de Recursos Humanos, a Dirección de Enfermería e a Dirección de Xestión.
O motivo para pedir este cesamento atópase na falta de información e a limitación de datos que se ofrece aos representantes do persoal sanitario por parte da xerencia. Estes colectivos entenden que os traballadores sanitarios precisan máis medidas de protección para facer fronte á pandemia e con máis reforzo de persoal de todas as categorías profesionais.
Afirman que se incumpren protocolos adaptados a servizos e centros de saúde debido á carencia destes recursos. Desde estes sindicatos indícase na convocatoria que non fan chamamento aos profesionais dos centros hospitalarios para que acudan á concentración co obxectivo de evitar riscos. Unicamente asistirá un representante de cada central sindical.
Lamentan que os representantes de Prosagap, Co.Bas e CESM non se somen a esta concentración, a pesar de realizar múltiples intentos para chegar a puntos comúns, sinalan os convocantes.
PRESENTACIÓN DE FIRMAS
Pola súa banda, estoutros tres sindicatos Prosagap, Co.Bas e CESM presentaban este mércores 700 firmas de profesionais sanitarios reclamando á dirección da área sanitaria que se lles dote de máscaras FFP2. Esta demanda presentárona en diversas comisións de saúde laboral sen que sexa aceptada por parte da xerencia. Por este motivo decidiron desenvolver a campaña de captación de firmas, que se presentaban no rexistro.
O doutor Enrique Marra-López manifesta que con esta petición formal tamén queda constancia á Inspección de Traballo da solicitude que realiza o persoal sanitario. O representante de CESM lamentou que continúe sen haber información por parte da xerencia e criticou que os centros hospitalarios continúen mantendo as súas portas abertas sen que se realice ningún control de acceso para evitar contaxios.
Relacionadas:
-
Representantes sindicais plantan á xerencia da área sanitaria por falta de información sobre impagos ao persoal
Por Mónica Patxot & Anxo Lourido |
-
Dúas concentracións de representantes sindicais sanitarios cun obxectivo: a marcha da xerencia do Complexo Hospitalario
Por Redacción |
-
Nova concentración sindical para reclamar a dimisión da directiva da xerencia do Complexo Hospitalario
Por Redacción |
-
Sindicatos denuncian o día a día do persoal sanitario: percorrer o hospital coa mesma máscara cirúrxica de 8 a 15
Por Natalia Puga & Mónica Patxot |
-
Os sindicatos, contra a xerencia da área sanitaria: "Se tiveran un mínimo de vergoña, dimitirían"
Por Redacción |
-
SATSE denuncia ante a Inspección de Traballo a alta porcentaxe de profesionais de enfermería infectados por covid en Pontevedra
Por Redacción |
-
Xeles caducados, máscaras sen protección e "barbaridades" na xestión do persoal levan a pedir o cesamento do xerente de Pontevedra
Por Natalia Puga |