'Pillan' dúas mulleres por estafar 11 pontevedreses en nome dunha asociación de doadores de órganos
Por Natalia Puga
Dúas mulleres, de nome Ana e Alicia, foron identificadas e denunciadas como autoras dunha suposta estafa por finxir ser integrantes dunha asociación de doadores de órganos para captar socios e quedar co diñeiro da cota. Lograron enganar 11 persoas nunha mañá antes de ser sorprendidas pola Policía Local de Pontevedra no ámbito do ambulatorio Virxe Peregrina.
As dúas supostas estafadoras facíanse pasar por colaboradoras da Asociación de Enfermos e Doadores de ÿrganos para Transplantes (AEDOPAT), unha entidade social que ten a súa sede en Palma de Mallorca e cuxa presidenta aclarou aos axentes da Policía Local que non ten ningún traballador en Galicia, que os seus voluntarios nunca cobran diñeiro en man e que esas dúas mulleres non teñen nada que ver con eles.
A presidenta dese colectivo mesmo sinalou á Policía Local o seu interese por denunciar as dúas supostas estafadoras e por comparecer como parte prexudicada se o caso chega a xuízo. Ademais, unha persoa foi identificada como presunta estafada e presentará denuncia.
A estafa descubriuse sobre as 10.45 horas do 28 de agosto grazas á alerta dunha muller que avisou unha patrulla policial que realizaba tarefas de vixilancia pola rúa Michelena. Indicoulles que había dúas mulleres pedindo diñeiro para unha asociación de transplantes de órganos e que lle resultaran sospeitosas.
Os axentes dirixíronse ao ambulatorio e detectaron, en primeiro lugar, unha das mulleres, que quixo eludir a presenza policial. Ao ver un policía, xirouse e intentou ocultar a documentación que levaba na man, pero logo respondeu ás súas preguntas e díxolle que era colaboradora da Asociación de Enfermos e Doadores de ÿrganos para Transplantes (AEDOPAT).
Tanto ela coma a súa compañeira levaban un carné co nome da asociación pegado no peito e explicaron que comunicaban aos viandantes a importancia da solidariedade e de ser doador. A continuación, ofrecíanlles ser socios e recollían os 5 euros que supoñía a cota de alta.
Segundo a documentación localizada pola Policía Local, esa mañá unha delas fixera e entregado o carné de socio a seis persoas e a outra a cinco, de modo que 11 cidadáns resultaron supostamente estafados crendo que se facían doadores de órganos e socios dunha asociación de forma fraudulenta.