Poio crea áreas de estacionamento para servizos en Campelo
Por Redacción
Ata unha ducia de prazas de aparcamento en Campelo estarán reservadas a partir de agora para servizos. Así o anunciou o goberno municipal, que xa ordenou habilitar estas áreas nas inmediacións da Praza da Granxa e en Viña da Crega.
"Trátase de enclaves nos que existen varios negocios e establecementos, polo que era preciso efectuar esta actuación", explica a concelleira de Seguridade Cidadá, Marga Caldas.
Os condutores disporán dun tempo de 30 minutos para poder efectuar diferentes xestións.
A Policía Local informa de que o horario de servizo nestas prazas estará vixente de 8.00 a 13.30 horas polas mañás e de 16.30 á 21.00 horas polas tardes. Non se aplicará en domingos ou en días festivos.
O Concello confía en que esta medida tamén axude a evitar estacionamentos indebidos nas proximidades, especialmente en zonas habilitadas para peóns, garantindo así a seguridade dos viandantes.
Ademais, recentemente tamén se habilitou unha praza de estacionamento específica para persoas con problemas de mobilidade reducida, que se sitúa na Rúa das Cachadas.
Nesta zona tamén se acometeu unha reordenación dos espazos para estacionamento, engadindo tamén prazas para carga e descarga, ademais de nova sinalización e dun paso de peóns para reforzar a seguridade viaria, sen que supuxese unha limitación de prazas libres.
Marga Caldas afirma que son medidas que se tomaron tendo en conta as peticións e necesidades dos veciños e veciñas de Campelo.
Relacionadas:
-
Chelo Besada responde ás críticas do PP á obra de Campelo: "Se tiveran un mínimo de vergoña estarían calados"
Por Oskar Viéitez |
-
Os populares de Poio critican que a reforma de Campelo "non ten nada que ver co que prometeron"
Por Oskar Viéitez |
-
Rescatan en Campelo un exemplar de aguia común, que non podía voar
Por Redacción |