Sanidade autoriza que os mariñeiros confinados en Marín sigan a corentena na casa
Por Alejandro Espiño
As autoridades sanitarias autorizaron que os doce mariñeiros que se atopaban confinados no buque de pesca "Sanamedio", que chegou o pasado mércores ao porto de Marín con toda a súa tripulación contaxiada da covid-19, poidan continuar coa corentena nos seus respectivos domicilios.
Fontes consultadas por PontevedraViva confirmaron que esta medida é voluntaria e, polo momento, só seis dos mariñeiros desembarcaron e abandonaron o porto marinense, tras ser recollidos por familiares nos seus propios vehículos.
A partir de agora, deberán gardar a corentena na súa casa e seguir o protocolo de illamento que Sanidade marca para calquera persoa que, tras dar positivo por covid-19, non teña que ser hospitalizado e poida recuperarse nos seus domicilios.
Os outros seis mariñeiros optaron por quedar facendo a corentena no barco, entre outros motivos, porque as súas circunstancias persoais e familiares así o recomendan.
O buque " Sanamedio" partiu de Marín rumbo ao caladoiro de Gran Sol, onde pretendía faenar ata nadal, hai apenas dúas semanas pero antes de chegar un dos mariñeiros comezou a mostrar síntomas da covid-19, un positivo que se confirmou cun test rápido.
Aínda que nun principio barallouse a posibilidade de que desembarcasen en Irlanda, finalmente o barco regresou a Galicia, a pesar de que segundo os familiares as condicións "eran cada vez peores" e o virus terminou contaxiando a toda a tripulación.