Un falecido e un ferido de consideración nun accidente de madrugada en Caldas de Reis
Por Redacción
Un home perdeu a vida e outro resultou ferido de consideración nun accidente de circulación acontecido durante a madrugada do sábado na estrada Nacional 640 ao seu paso por Caldas de Reis.
En concreto o accidente tratouse dunha saída de vía, cun único vehículo implicado, que tivo lugar segundo o Centro de Atención ás Emerxencias 112 Galicia preto das 2.00 horas da madrugada no quilómetro 228 da citada estrada, no tramo que conecta o núcleo urbano coa autoestrada.
O servizo de emerxencias confirma que o falecido é o copiloto do vehículo, mentres que o condutor foi atendido polos efectivos de urxencias sanitarias presentando "feridas de consideración".
Os dous ocupantes do turismo tiveron que ser excarcerados do mesmo polos Bombeiros do Salnés, ao quedar atrapados no interior.
Tras ter coñecemento do suceso pola chamada de alerta de varios particulares, o 112 solicitou a intervención do 061, Bombeiros, Policía Local, Guardia Civil de Tráfico, Protección Civil de Caldas de Reis e do servizo de mantemento de estradas.