Pontevedra segue incrementando o número de casos activos no municipio. A cifra ascende a 226 persoas afectadas por  covid, 15 máis que na xornada do xoves. No mapa do SERGAS continúa no nivel 3 de alerta do mesmo xeito que Poio, que contabiliza este venres 47 casos, catro positivos máis que hai 24 horas, segundo os datos ofrecidos pola Consellería de  Sanidade.

Son os dous únicos municipios da comarca de Pontevedra que se atopan no punto máis alto do nivel de alerta. O outro Concello da área sanitaria de Pontevedra - O Salnés que rexistra leste mesmo nivel é Vilagarcía de Arousa, que tamén continúa incrementando o número de casos activos. Alcanza a cifra de 65, tres  contagios máis que este xoves. Desde o  Concello vilagarcián insisten en pedir á poboación prudencia e que actúe con responsabilidade e sentido común para evitar que se siga expandindo o virus.

En Vilanova de Arousa, o  concello veciño, mantense o nivel verde, sen que se detectaron novos  contagios nas últimas 24 horas. Ademais rexistráronse dúas novas altas médicas situándose o número de activos en 28.

A área sanitaria de Pontevedra-O Salnés continúa en nivel laranxa en xeral e volve subir lixeiramente o número de  contagios diarios. Rexistráronse 59 novos casos, 20 por cada 100.000 habitantes.

En Cambados, o rexistro de  contagios baixou a 16, dous menos nas últimas horas. En Sanxenxo tamén descendeu tamén en dous casos, situándose en 15 casos activos. Por último, en Marín tamén descendeu nun os casos e mantéñense 33 activos.

De fronte ao fin de semana, as autoridades lembran que se deben de cumprir as medidas de seguridade extremando a vixilancia. A hostalería e restauración poderán contar co 50% do aforo no interior e 75% nas terrazas, coa prohibición de que a clientela utilice a barra. Os establecementos comerciais só poderán admitir o 50% do seu aforo, con preferencia para persoas maiores de 75 anos.

Limítanse as reunións en xeral a un máximo de 5 persoas, están prohibidas as festas e verbenas. Os eventos no exterior terán unha capacidade máxima de 150 persoas e 60 os actos en interiores.

Mentres que nos lugares de culto, redúcese a capacidade á metade. En vodas e celebracións, só permítense 100 persoas no exterior e 50 no interior. Nos velorios e enterros, o máximo de persoas establécese en 25 no exterior e 10 no interior.