Mergulladores realizan unha limpeza exhaustiva do fondo mariño de Combarro
Por Redacción
Un grupo de mergulladores, coordinados pola asociación Mesa Pola Ría, realizou este domingo unha limpeza exhaustiva do fondo mariño de Combarro.
Esta foi a terceira das accións ambientais desenvolvidas por este colectivo, que xa limparan as zonas de Portonovo e Aguete en días pasados.
Segundo Javier Ruiz de Cortázar, presidente da Mesa pola Ría, os equipos de limpeza recolleron unha gran cantidade de residuos do leito mariño de Combarro e arredores.
O proxecto, chamado Limpa a túa ría, ten o obxectivo de educar e concienciar no ámbito ambiental a todos os veciños dos municipios da ría de Pontevedra, facendo especial fincapé na importancia do coidado da contorna e contribuíndo á súa conservación.
Unha parada máis, no porto de Beluso (Bueu) o próximo 25 de outubro, completará esta iniciativa, financiada a través do Plan Social de Ence.