Rías Baixas aspira a ser a rexión vitivinícola do ano
Por Redacción
A prestixiosa revista Wine Enthusiast dá coñecer os nomeados aos galardóns Wine Star 2020, e entre eles atópase a Denominación de Orixe Rías Baixas, que opta a converterse na rexión Vitivinícola do Ano. Os gañadores da 21ª edición destes premios serán desvelados o próximo 11 de novembro.
"Este nomeamento é un recoñecemento á traxectoria de todo o sector de Rías Baixas, adegueiros e viticultores", explica Eva Mínguez, directora de márketing do Consello Regulador, para quen "esta mención non podía chegar en mellor momento. A pesar da covid-19 e dos aranceis de Estados Unidos, os viños de Rías Baixas mostran a mellor das súas caras e son recoñecidos polo consumidor e os profesionais estadounidenses o que nos dá forzas por continuar dándonos a coñecer e conquistar novos mercados", engadiu.
A pesar dos obstáculos, Estados Unidos é o primeiro mercado internacional no que se venden os viños das Rías Baixas e representa o 28% das vendas con 2.254.260 litros exportados no exercicio 2019.
A promoción destes viños no país norteamericano continúa e no mes de setembro, a D. O. Rías Baixas levou a cabo tres eventos promocionais en Newport e Boston.