Chelo Besada responde ás críticas do PP á obra de Campelo: "Se tiveran un mínimo de vergoña estarían calados"
Por Oskar Viéitez
A primeira tenente alcalde do Concello de Poio e concelleira de obras e Servizos, Chelo Besada, saiu ao paso das críticas do PP local á obra de mellora da estrada provincial de Campelo-Portosanto.
O PP de Poio fala de incumprimentos en relación a unha infografía da praza da Granxa e, segundo sinala Chelo Besada, "plantexan a peonalización que suporía cortar o trafico rodado no centro de Campelo medida que non compartimos".
A concelleira socialista sinala que a reforma deste espazo e da estrada provincial chega "despois de anos de abandono deste vial polo goberno do PP na Deputación e coa complicidade do PP de Poio" que "mantiveron esta estrada nun estado lamentable con continuos accidentes, moitos deles mortais, e foron incapaces de facer ningunha mellora en 40 anos".
Por iso, para Chelo Besada resulta "chamativo" este comportamento dos populares agora que "un novo goberno da deputación presidido por Carmela Silva foi quen de acometer unha obra moi necesaria e demandada que mellora de maneira substancial a seguridade tanto para o tráfico rodado como os peóns, que conta con todos os servizos, con iluminación eficiente, con accesibilidade universal e un modelo que revoluciona o tratamento urbano da contorna", dixo a tenente de alcalde de Poio.
Chelo Besada asegura que o PP de Poio "intentou poñer obstáculos e trabas durante toda a execución intentando poñer aos veciños en contra do proxecto sen éxito".
Remata dicindo a tenente de alcalde que os populares "se tiveran un mínimo de vergoña estarían calados despois da tomadura de pelo durante anos aos veciños de Campelo e Anafans, mantendo a estrada nun estado tercermundista e servindo de coartada do goberno da Deputación de Louzán para non facer nada. Agora que a obra é unha realidade intentan enfangar que é o único que saben facer".