O PP acusa o PSOE de "traizoar a Pontevedra" ao posicionarse en contra da reapertura de Raíña Vitoria
Por Manu Otero
O líder da oposición no Concello de Pontevedra, Rafa Domínguez, segue buscando a forma de facer rectificar ao executivo local na súa decisión de pechar ao tráfico a rúa Reina Vitoria. Este mércores, o portavoz dos populares acusou os socialistas, socios de goberno dos nacionalistas, de "traizoar a Pontevedra" despois de votar en contra da reapertura desta vía na comisión de Mobilidade do pasado martes na que se estudou a moción presentada polo PP e que será rexeitada, se non hai cambios de última hora, no pleno da próxima semana.
"Tiñamos esperanza no PSOE e na concelleira de Promoción Económica, Yoya Blanco, que finxiu empatía cos negocios e díxolles que estaba en contra do peche", asegura Domínguez, que alerta dunha "submisión lamentable" do PSOE ante o BNG. "Espero que reflexionen de aquí ao luns e reconsideren o seu voto", presionou o edil.
Tamén tivo palabras Rafa Domínguez para o BNG aos que acusa de mentir e de contradicirse. Segundo os populares, na última comisión o responsable de Mobilidade, Demetrio Gömez, negou a existencia de problemas de tráfico derivados do peche desta rúa, algo que logo desmentiu César Mosquera. "Un esperpento", definiu o líder da oposición despois de repasar todos os capítulos deste conflito desde que o goberno local anunciase a súa decisión de cortar o tráfico rodado nesta rúa para favorecer a distancia de seguridade na entrada e saída de alumnos do instituto Sánchez Cantón.
Dada a grave situación sanitaria, Domínguez descartou, polo momento, promover mobilizacións para protestar por unha decisión do Concello tomada "sen informes e en base a unha mentira".
Pola contra, mostrouse moito máis comprensivo coas restricións na rúa Alfonso XIII porque "é máis entendible e xerou menos rexeitamento entre a xente", rematou.
Relacionadas:
-
O PP pide a reapertura de Raíña Vitoria tras o fin do estado de alarma e ante o fin do curso escolar
Por Natalia Puga |
-
Multas de 100 e ata 500 euros aos condutores na rúa Raíña Vitoria
Por Oskar Viéitez |
-
O PP, preocupado porque o peche de Raíña Vitoria atrasa as intervencións dos servizos de emerxencia
Por Redacción |
-
Mosquera compara aos opositores ao peche de Raíña Vitoria cos "cayetanos"
Por Oskar Viéitez & Mónica Patxot |
-
O PSOE exhibe a súa lealdade ao BNG e pide tempo para valorar se o peche de Raíña Vitoria é acertado
Por Manu Otero |
-
O corte de Raíña Vitoria será "indefinido" e manterase "mentres dure a covid-19"
Por Alejandro Espiño |
-
Comerciantes, empresarios e oposición fan piña para reabrir Raíña Vitoria ao tráfico
Por Manu Otero |