O PP lamenta o "tempo perdido" na Deputación coa implantación do teletraballo
Por Oskar Viéitez
O grupo provincial do Partido Popular aplaude o "cambio de criterio do Bipartito" da Deputación de Pontevedra para "agora si", poñer en marcha o teletraballo, unha medida que reclamaron os populares a principios deste ano nunha moción que contaba co apoio dos representantes sindicais e que se atopou co rexeitamento dos dous grupos de goberno.
Con todo, o voceiro do PP, Jorge Cubela, lamenta o "tempo perdido, porque agora estaríamos falando de que a implantación do teletraballo sería xa unha realidade".
Para o deputado popular, este cambio de criterio do goberno provincial PSOE-BNG "demostra que moitas das iniciativas que presentan os populares na Deputación de Pontevedra son rexeitada polo mero feito de que son propostas que saen do PP, por interese partidista e sen reflexionar si son positivas e necesarias".
"Este Bipartito votou en contra da implantación do voto telemático na Deputación e do teletraballo, dúas cuestións que meses despois, e coa crise sanitaria, se demostrou que eran fundamentais", dixo Cubela.
Por iso, non entenden ese "triunfalismo" por parte da presidenta da Deputación, Carmela Silva ao anunciar que a administración provincial adaptará a normativa estatal sobre o teletraballo. "Chegan tarde, equivocáronse en xaneiro ao votar en contra do que reclamaba o PP e tamén os sindicatos desta casa, que xa o incluíron nas súas alegacións aos orzamentos de 2020", sinala Cubela.
Nesta liña, di que "hai que ser máis humildes e si non se quere recoñecer os erros, polo menos non falar de ser unha institución pioneira". Recorda así, que xa son moitas as deputacións provinciais, concellos e tamén autonómicas, como o caso da Xunta de Galicia, que xa levan tempo funcionando co teletraballo.
Relacionadas:
-
Piden á Deputación que fomente o teletraballo para reducir o número de traballadores en cada servizo
Por Oskar Viéitez |
-
Rueda destaca o "papel importante" do PP na Deputación
Por Oskar Viéitez |
-
A Deputacion adaptará a normativa estatal sobre teletraballo incorporando a perspectiva de xénero
Por Oskar Viéitez |
-
A Deputación abordará cos sindicatos novas propostas de conciliación
Por Oskar Viéitez |
-
A Deputación elaborará un informe alertando do temor a que as mulleres volvan quedar invisibilizadas tras o teletraballo
Por Redacción |
-
Carmela Silva: "O teletraballo nada ten que ver coa conciliación"
Por Oskar Viéitez |