Piden catro anos de prisión para dous acusados de trapichear na avenida de Lugo
Por Oskar Viéitez
A Sección cuarta da Audiencia provincial de Pontevedra sinalou para este xoves día 15 de outubro un xuízo por un delito contra a saúde pública. Xúlgase a dous acusados de traficar con droga. O fiscal solicita para cada un deles catro anos de cárcere.
Segundo o escrito de acusación da Fiscalía, o 18 de maio de 2018 uns axentes de policía que se atopaban na Avenida de Lugo de Pontevedra viron como A. M. C. entregaba a R. S. C., un envoltorio de cor branca en cuxo interior había 24,96 gramos dunha substancia que, unha vez analizada, resultou ser cocaína, cunha riqueza do 31,46% e un valor de 1.456 euros.
R. S. C. comprou substancia para destinala á venda a terceiras persoas. No seu poder foron achados 180 euros produto de anteriores vendas.
A Fiscalía pide ao tribunal que impoña a cada un dos acusados a pena de catro anos de prisión e multa de tres mil euros con responsabilidade persoal subsidiaria dun día de privación de liberdade por cada cincuenta euros ou fracción que deixen de abonar.