Chequeo ás pontes e pasos elevados da rede de estradas provinciais
Por Redacción
O goberno da Deputación vén de aprobar o expediente para a contratación dun servizo de inventario, inspección e avaliación de pontes e obras de paso das estradas provinciais.
"Todas e todos recordamos situacións como a que aconteceu en Italia, coa caída dunha ponte que levantou todas as alarmas. Queremos revisar e avaliar todas as pontes da nosa rede de estradas e ter información veraz para poder actuar", dixo en rolda de prensa a presidenta da Deputación, Carmela Silva.
A administración provincial investirá 283.588 euros para un proxecto que se desenvolverá durante os anos 2021 e 2022.
A través desta actuación vaise obter un coñecemento detallado das características actuais dos pasos e pontes, detectando problemáticas e anomalías existentes para planificar actuacións a desenvolver. Vanse recompilar todos os datos e revisar a información sobre as obras de paso existentes na rede da Deputación pero tamén daqueles que, pertencendo a outras administracións, supoñan restricións ou condicionantes para as estradas provinciais.
Para elo, a empresa que resulte contratada deberá seguir as instrucións marcadas polo Ministerio de Fomento na súa “Guía para a realización do inventario de obras de paso”.
En liñas xerais, a través desta actuación vaise crear unha ficha de inventario por cada obra de paso existente na rede de estradas provinciais ou relacionada coa mesma.
Para poder cumprimentar cada ficha realizarase unha toma de datos e inspeccións principais, tanto visuais como detalladas. Os traballos analizarán as xuntas, varandas, o estado do firme e pavimento así como todos aqueles elementos que sexan susceptibles dalgún tipo de mantemento por parte da Deputación o afecten á circulación.
Tamén determinarán o grao de deterioro, a súa localización, gravidade e incidencias que poidan afectar á estrutura. Finalmente, vaise crear unha aplicación informática para o sistema de xestión de obras de paso que incluirá toda a información, recollida durante o proceso anterior, xeorreferenciada.