A diferenza do que ocorreu noutras comunidades, Galicia segue sen recuperar "en absoluto", segundo o goberno galego, as limitacións impostas pola covid-19 nos servizos de mobilidade ferroviaria. É dicir, hai menos trens.

A este respecto, a conselleira de Infraestruturas, Ethel Vázquez, expresou en Pontevedra a "máxima preocupación" que existe en Galicia ante o recorte nas frecuencias dos trens que unen entre si ás principais cidades galegas e a toda a comunidade con Madrid.

"Témonos dirixido a Renfe continuamente. As evasivas son constantes e non tivemos resposta", dixo a responsable de mobilidade no goberno galego, que reiterou a "oposición frontal" da Xunta á política ferroviaria de Renfe e o Ministerio de Transportes.

Este recorte nas prestacións dos trens en Galicia está "a limitar de maneira substancial", segundo a conselleira, "o dereito de miles de galegos para acudir ao seu traballo, para ir á universidade e, para en definitiva, facer o seu día a día".

Tras esixir ao ministerio unha "rectificación" sobre a oferta ferroviaria na comunidade, Ethel Vázquez tamén criticou os plans de Renfe de unir Pontevedra con Madrid a través de Santiago e a nova liña de alta velocidade por Pedralba (Zamora).

Esta decisión, lamentou a titular de Infraestruturas, deixa fóra á cidade de Vigo das "melloras" que ofrecerá a alta velocidade "que agardemos chegue pronto a Galicia".

As restricións impostas por Renfe, insistiu Vázquez, "merman a mobilidade dos galegos", polo que esixe ás autoridades ferroviarias que respondan os requirimentos realizados pola Xunta de Galicia.