"Eu son Loureiro" é a campaña para dinamizar o comercio de Loureiro Crespo durante a humanización da vía
Por Manu Otero
A reforma urbana de Loureiro segue en marcha e desde o Concello están decididos a reducir ao mínimo os prexuízos que os traballos poidan ocasionar a veciños e comerciantes. Con esta premisa xorde a colaboración entre o goberno local e a asociación de empresarios da rúa, bautizada como Eu Son Loureiro, que ten como obxectivo "dinamizar o comercio local e xerar vida nos barrios", declarou o concelleiro de Mobilidade, Demetrio Gómez, acompañado pola presidenta do colectivo, María Diz.
A campaña está estruturada en varias fases. A primeira consistiu nun primeiro achegamento entre ambas as partes para analizar o número e tipo de negocios presentes na zona. A segunda baséase no traballo directo cos participantes, na elaboración dun censo de todos os comercios e na achega de material gráfico para realizar unha exposición sobre a historia desta rúa que servirá tamén para dinamizar o comercio de proximidade a través das redes sociais.
O terceiro paso da iniciativa contará xa cos clientes e centrarase na instalación de paneis na rúa con información sobre o tipo de comercios presentes no barrio. Para o mes de novembro está previsto a estrea dunha exposición titulada O Noso Barrio na que os escaparates da rúa lucirán fotografís históricas e emblemáticas da zona de Loureiro Crespo. Xa en decembro, para animar a campaña de Nadal, os comerciantes regalarán unha pulseira conmemorativa aos clientes e o Concello organizará visitas guiadas polo barrio.
"Temos comercios de moitos tipos, é un barrio con moita historia e o obxectivo non é só ser un barrio de primeira, tamén parecelo", declarou a presidenta da asociación de empresarios durante a presentación da campaña.
O orzamento que manexa o Concello para esta actividade rolda os 18.000 euros e o concelleiro de Mobilidade non descarta estender estas campañas ás reformas urbanas doutros barrios sempre que o empresariado e os veciños implíquense do mesmo xeito que ocorreu en Loureiro Crespo.
APARCAMENTO DISUASORIO EN VALDECORVOS
A renovación desta céntrica rúa non é a única obra en marcha que terá repercusión no comercio local. Comunica o goberno local que esta semana comezarán a construción dun novo aparcamento disuasorio na rúa Prado Novo do barrio de Valdecorvos. O prazo de execución previsto polo Concello é de 4 meses e á conclusión dos traballos quedarán habilitadas ao redor de sesenta novas prazas de estacionamento gratuíto.
Relacionadas:
-
#Eusonloureiro, a campaña para dinamizar o comercio de Loureiro Crespo, xa ten 42 socios
Por Redacción & Mónica Patxot |
-
A partir deste sábado 14 estará dispoñible o novo aparcadoiro de Valdecorvos
Por Mónica Patxot & Redacción |
-
Corte de tráfico ata o venres en Loureiro Crespo polas obras de reforma
Por Redacción |
-
Loureiro Crespo, entre o Provincial e a pasarela, estará rematada en dous meses
Por Alejandro Espiño & Mónica Patxot |
-
Cortes de tráfico a partir do luns 31 para completar o primeiro tramo da reforma de Loureiro Crespo
Por Redacción |
-
Este luns péchase a circulación de entrada á cidade entre as rúas Forcarei e Amor Ruibal polas obras en Loureiro Crespo
Por Redacción |
-
Comezan as obras nun novo tramo de Loureiro Crespo
Por Redacción |