200.000 euros para deixar as marxes das estradas provinciais libres de árbores
Por Redacción
A Deputación Provincial de Pontevedra contratará un servizo de tala de arborado no dominio público das marxes das estradas provinciais como medida preventiva para facilitar a loita contra os incendios forestais.
O Goberno da Deputación vén de aprobar a contratación para a adxudicación do servizo, no que se investirán máis de 201.500 euros ao fío das tarefas de conservación destes viarios.
A presidenta da Deputación, Carmela Silva, destacou que son traballos de especial importancia como medida preventiva contra o lume e evitan o efecto prexudicial que a vexetación ocasiona nas estradas.
Ademais, con este servizo, atenden unha das principais demandas da poboación, "que as marxes dos viarios estean en boas condicións", en palabras de Carmela Silva.
O novo contrato para este servizo especifica que se deben talar todas aquelas especies que aparecen na Lei 3/2007 de prevención e defensa contra os incendios forestais de Galicia e optarase por conservar aquelas árbores singulares que cumpran outro tipo de funcións.
O servizo contratarase para o ano 2021 (está en vigor o do 2020) por zonas de actuación, correspondentes ao norte, centro e sur da provincia.
Ademais das estradas provinciais, estarán incluídos os camiños de servizo, enlaces, cruces, variantes e calquera outro terreo que integren o dominio público adscrito a estas vías. Así mesmo, abordarase a tala puntual de arborado non situado na zona de dominio público cando a árbore ameace a seguridade viaria e o titular da parcela onde se sitúe non atenda os requirimentos da Deputación.