O PP lamenta o "enorme prexuízo" que causan a centos de veciños de Poio os peches de vías de Pontevedra
Por Redacción
O voceiro do PP de Poio, Ángel Moldes, referiuse este sábado ás recentes medidas aplicadas no Concello de Pontevedra en cuestións de tráfico e lamentou "o enorme prexuízo" que os peches de determinadas vías de entrada a Pontevedra están a causar a centos de veciños de Poio, especialmente de San Salvador "que van diariamente a traballar, comprar ou facer xestións a Pontevedra".
Moldes non fixo referencia directa a ningunha medida, pero si alusión velada ao corte aplicado esta semana na avenida Raíña Vitoria e o anunciado para Alfonso XIII, dúas rúas moi próximas á ponte da Barca que comunica Pontevedra e Poio. E advertiu ao alcalde de Pontevedra, Miguel Anxo Fernández Lores, e ao seu concelleiro de Mobilidade, César Mosquera, que se o fin último das restricións ao tráfico é eliminar o dobre sentido da circulación na ponte da Barca, "vannos ter en fronte, a nós e á inmensa maioría dos veciños de Poio".
Desde o PP de Poio recoñecen e respectan a autonomía de cada concello e as decisións do goberno local de Pontevedra sobre as súas rúas, "aínda que non nos gusten", pero advirten que se o obxectivo oculto desas medidas é cortar "de forma unilateral" a circulación na ponte da Barca "non llo imos consentir".
O voceiro popular recordou que o corte da ponte da Barca é "unha obsesión declarada do BNG de Pontevedra que levan intentando impoñer cada vez cunha escusa diferente", como obras no abastecemento de auga, traballos en distintos lugares de Poio e Pontevedra, "pero se esta vez pretenden usar como coartada o virus que está a castigar Galicia e especialmente a nosa zona, estarían cruzando todos os límites".
"Esperamos que, chegado o caso, poidamos contar co apoio do resto dos grupos políticos de Poio", expresou Moldes, aínda que dubida que o alcalde de Poio, o nacionalista Luciano Sobral, se opoña a decisións do seu compañeiro de partido Lores.
Relacionadas:
-
Comerciantes de Raíña Vitoria trasladan ao Concello o seu rexeitamento ao corte ao tráfico da rúa
Por Redacción |
-
Fronte común do PP de Pontevedra e Poio contra o peche da rúa Reina Vitoria
Por Redacción |
-
O PP critica ao Goberno local por pechar Raíña Vitoria "sen base técnica nin consenso"
Por Redacción |
-
Só os residentes poderán circular por Alfonso XIII, que pasará a ser o patio de recreo das Doroteas e o Froébel
Por Manu Otero |
-
A asociación de técnicos sanitarios cualifica de "temeridade" a instalación de bolardos fixos en Raíña Vitoria
Por Diego Espiño |
-
Raíña Vitoria cortarase ao tráfico con "carácter permanente" para favorecer a entrada, saída e recreos do Sánchez Cantón
Por Diego Espiño |