Marín engalánase para celebrar un San Miguel que se vivirá máis on line que na rúa
Por Redacción
Marín está xa ás portas do que adoita ser un dos seus días grandes, a festividade de San Miguel, e a proximidade da celebración xa se deixa notar nas rúas da localidade, que se engalanaron para a ocasión.
As rúas xa están esta fin de semana engalanadas con fitas de cores pendurando dos farois e con cubos cheos de información divulgativa sobre a festa e a súa popular Danza das Espadas a modo de exposicion temporal.
Este ano marinenses e visitantes quedarán sen gozar da tradicional Danza das Espadas e sen o resto das celebracións, pois a festa de San Miguel non se vivirá na rúa, senón máis no mundo on line.
O martes, 29 de setembro, propio día de San Miguel, haberá oficio relixioso, pero o resto dos actos previstos suspendéronse polas medidas restritivas derivadas da pandemia da Covid-19.
No mundo dixital, o Concello procederá á publicación dun vídeo nas canles de comunicación oficiais sobre a historia da Danza das Espadas e da tradición do San Miguel.
O vídeo conmemorativo ofrecerá entrevistas cos principais protagonistas do día, Lois González Dopazo como presidente do Ateneo Santa Cecilia e Antonio Caíña e Sergio Santiago como representantes dos dous grupos de danzantes que este ano non poderán realizarr a súa interpretación desta tradición tan arraigada na vila.