Decenas de alumnos apíñanse na entrada do IES Sánchez Cantón, os seus pais, na beirarrúa de en fronte, observan cunha mestura de preocupación e alivio. E mentres tanto dous operarios arrincan cunha radial o sinal indicativo dun paso de peóns fronte á porta do instituto para preparar a rúa Reina Vitoria para o seu futuro sen coches. É a fotografía da volta á vida dos institutos pontevedreses máis tensa e surrealista que se lembra.

O Sánchez Cantón, por ser un dos institutos con maior número de alumnos e plantar cara á semipresencialidade imposta pola Xunta, centrou todas as miradas desta primeira xornada de clase para a Educación Secundaria Obrigatoria. Pero a escena foi similar no resto de institutos da cidade aos que os alumnos se están incorporando de forma graduada. 

As aglomeracións repetíronse tamén no paseo de Montero Ríos, mentres os estudantes esperaban para entrar no Valle Inclán. En cambio, máis ordenada foi a volta no IES Frei Martín Sarmiento. "Levámonos unha grata sensación polo comezo despois de tanto estrés", confesa aliviado e satisfeito o director do instituto, David Alvariño.

Divididos en catro entradas segundo os seus estudos, os alumnos foron accedendo ao interior do centro escalonados en períodos de quince minutos. Cada grupo era recibido no ximnasio polo equipo directivo e o seu titor que, despois dunha breve benvida, conducíaos ás súas aulas. "Foi ordenado e moi tranquilo. O traballo previo para seguir as normas funcionou", recoñece o director dun centro que conta con máis de 1.200 matrículas e que recibe nesta primeira xornada aos alumnos de primeiro e segundo da ESO, de primeiro dos ciclos superiores e medios. Pola tarde será a quenda de bacharelato, que neste centro si será presencial pero por problemas de espazo terán que asumir un horario de 16 a 22 horas durante todo o curso. O xoves será a quenda dos cursos restantes.

Un sistema similar trataron de implantar no Sánchez Cantón e no resto de centros. Neste histórico instituto, os primeiros en incorporarse foron os máis pequenos. Minutos antes das 11.30 horas, estudantes de primeiro da ESO apiñábanse na beirarrúa á espera da apertura das portas para coñecer o seu novo centro educativo. No enreixado de entrada recibiunos un membro do equipo directivo, quen lles deu a benvida e lembroulles as normas que deben cumprir por seguridade e detalloulles a nova organización das clases. Logo conduciunos, gardando cola e distancia de seguridade, ao  paraninfo para repartirse finalmente entre as aulas.

A posta en escena repetiuse hora e media despois cos de segundo da ESO, farao de novo esta tarde cos de bacharelato e ciclos superiores e mañá co resto de cursos. Todos volverán esperar no exterior ata ser chamados a un salón de actos no que se lles da a benvida ao curso da Covid, o máis surrealista e incerto.

Pantalla completa