O Concello inviste 10.000 euros para mellorar o pavillón de Xeve
Por Redacción
A Concellería de Deportes de Pontevedra anunciou este mércores o investimento de 1.028,12 euros na contratación das obras para renovar as instalacións do pavillón de Santo André de Xeve.
Trátase duns traballos que serán executados pola empresa Acevi Actividades de Construción e incluirán o acolchado de seguridade da bancada, a reparación dos vestiario e da estrutura translúcida da fachada.
"Permitirán asegurar o esqueleto do pavillón, mediante a suxeición da estrutura de translúcidos", explicou o concelleiro Tino Fernández sobre a soldadura prevista nas placas de base e os elementos e pezas necesarias que afirmen a súa estabilidade. Así, retiraranse as fixacións actuais colocando unhas novas con tacos metálicos.
En canto aos vestiarios está previsto arranxar fechaduras e manillas das portas, repoñerase o alicatado caído en paredes e selaranse as xuntas dos peches para impedir a entrada de animais silvestres.
REPARACIÓN DAS ESCALEIRAS NO PAVILLÓN MUNICIPAL DOS DEPORTES
Por outra banda o Concello vai acometer tamén tarefas de reparación nas escaleiras das bancadas do Pavillón Municipal dos Deportes, obra que contratou á empresa Ogando Durán SL por un importe de 1.344,73 euros.