Cuntis celebra que se fixen novas liñas de transporte de ida e volta para os estudantes que se desprazan cara á Estrada
Por Redacción
O alcalde de Cuntis, Manuel Campos, informou este venres que, dentro da reestruturación das liñas regulares de transporte posta en marcha tras a nova concesión do servizo por parte da Xunta, quedaron fixadas novas liñas regulares de ida e volta á Estrada que ofrecerá e empresa Monbus e que darán servizo principalmente ao alumnado que acode a cursar estudos de bacharelato aos institutos desta localidade.
Desta maneira, Cuntis recupera un servizo regular moi demandado polo colectivo de estudantes que comezará a funcionar de inmediato.
Os novos horarios de parada da liña en días laborables foron trasladados este venres ao Concello. A ida á Estrada quedou fixada para as 07.50 horas, con varias paradas en Cuntis ao longo da N-640 e chegada aos institutos entre as 08.10 e as 08.15 horas. A volta terá lugar ás 14.25 horas.
A tarifa mínima establecida dende Cuntis é de 1.45 euros. Ademais, dentro dos novos recorridos regulares, Monbús realizará o traxecto de Caldas de Reis a Cuntis todos os días laborais ás 14.30 horas, mentres que a ruta de Cuntis a Caldas a realizará a empresa Benito Abalo.
Por outra parte, o alcalde lembrou que o Concello de Cuntis solicitou hai tempo a adhesión ao programa de transporte da Área Metropolitana de Santiago de Compostela sen que fose aceptada. Campos reivindica novamente que Cuntis pase a formar parte deste programa autonómico de transporte interurbano pois considera que "a súa exclusión é un agravio claro para a mocidade do noso concello con respecto a doutros municipios limítrofes".
"Non ten lóxica", indica, "que un estudante da Estrada ou de Pontevea poida viaxar gratuitamente a Compostela grazas a este programa, mentres que a mocidade de Cuntis estando á mesma distancia de Santiago teña que pagar".