Ditaminada a favor a Conta Xeral 2019 do Concello de Pontevedra
Por Redacción
A Comisión especial de Contas do Concello de Pontevedra reuniuse este martes para ditaminar a Conta xeral 2019 (a listaxe de todas as facturas pagadas durante o ano 2019). Foi votada favorablemente cos votos dos grupos municipais que conforman o Goberno (BNG-PSOE) e coa abstención dos grupos municipais PP e Mixto.
A Conta xeral terá que ser publicada nos vindeiros días no Boletín Oficial da provincia de Pontevedra cun prazo de reclamación de 15 días + 8. Logo de rematar o proceso de exposición pública, será a quenda da aprobación por parte do Pleno da Corporación.
Debido ao Estado de Alarma ditado con motivo da pandemia mundial da Covid-19, que acordou a paralización dos prazos administrativos, a Conta xeral tamén sufriu demoras.
Con anterioridade á Covid, a Conta xeral tiña que estar aprobada antes do 1 de outubro. Neste momento o prazo legal pasa ao 21 de xaneiro de 2021. E se tiña que estar remitida ao Consello de Contas antes do 15 de outubro de 2020, agora o prazo remata o 22 de xaneiro de 2021.
O Concelleiro de Economía e Facenda, Raimundo González, que presidiu esta comisión, afirmou que "estaríamos en disposición de non esgotar o prazo legal actual e poder levar a Conta xeral a debate no pleno municipal de outubro ou novembro".