Pontevedra activa un plan para reparar os estragos nos bancos da cidade
Por Redacción
Os bancos da cidade serán obxecto dunha profunda revisión. Será a través dun contrato que vén de activar o departamento municipal de Mantemento do Espazo Urbano. Trátase de actuar neste mobiliario urbano que polo paso do tempo ou polo uso, está deteriorado ou roto, nalgúns dos casos, para que recuperen o seu estado orixinario e poidan ser empregados con confianza por parte de todos os pontevedreses.
Aínda que se fará unha actuación integral en todo o ámbito urbano, os traballos comezarán pola avenida de Santa María, onde se actuarán nos seis bancos así como no banco-xardineira da praza. É un dos lugares máis empregados e concorridos da cidade por persoas de todas as idades, onde este tipo de mobiliario urbano "é indispensable", sinalan desde o Concello.
Logo se trasladarán ao Paseo de Colón para reparar os seis bancos da rúa aos que lles falta algunha táboa; a Arcebispo Malvar (oito bancos) e cinco na rúa da Corva (San Brais).
Logo continuarán por outros barrios como Eduardo Pondal, Campolongo, A Parda e O Burgo atendendo ás necesidades máis urxentes.
Dependendo do estado dos bancos actuarase dunha maneira ou doutra. Os máis deteriorados retiraranse para ser tratados no taller e, despois, volver a poñer no seu lugar orixinario. Os menos deteriorados, poderanse restaurar in situ. Outros bancos especiais, como a xardineira de Santa María, deberán tratarse alí mesmo.
Os traballos consisten no decapado da madeira a base de lixado, así como dos pés. Logo vernizarase a madeira ou se pintará (de ser o caso) e volverán a colocarse no lugar retirado. Neste proceso tamén se substituirán madeiras que poidan estar rotas ou ser perigosas, así como os pés que tamén poidan estar en mal estado.