Cuntis, sen novas polos cambios nos servizos de transporte público en liña regular
Por Redacción
O Concello de Cuntis lamenta a incertidume xerada debido á falta de información por parte da Dirección Xeral de Mobilidade da Xunta de Galicia sobre os próximos cambios nos servizos de transporte público en liña regular que afectan ao municipio.
Segundo explican, tras realizarse unha nova concesión, as empresas que viñan realizando as liñas en Cuntis, como é o caso de La Estradense, deixarán de facelo a partir do vindeiro día 9 de setembro.
Non obstante, "a día de hoxe os concellos afectados non recibimos ningunha información oficial acerca de como quedan as novas liñas regulares e sobre como nos afectan os novos itinerarios", aseguran desde o goberno municipal.
En vista da situación, o Concello de Cuntis vai solicitar á Dirección Xeral de Mobilidade que "remita con urxencia explicacións detalladas e por escrito de como quedarán estruturados os servizos e itinerarios de transporte público que vai ofrecer a nova UTE".