Chegan catro días con temperaturas de máis de 30 graos nas Rías Baixas
Por Redacción
Este inicio de setembro chega con altas temperaturas ás Rías Baixas. Segundo as predicións do servizo de Meteogalicia, as altas presións sitúanse no norte da península Ibérica de forma que, ademais de estabilidade, achegarán aire cálido procedente do sur peninsular. Isto supón que en xeral os ceos estarán pouco nubrados ou despexados. As temperaturas ascenderán, tanto as mínimas como as máximas, quedando con valores que pasarán dos 14 aos 31 graos. Os ventos soprarán frouxos de dirección variable, con brisas costeiras durante a tarde nas Rías Baixas.
O venres 4 manteranse con altas presións procedentes do norte dos Azores, que achegan estabilidade e aire cálido do sur. O ceo manterase pouco nubrado ou despexado, coa posibilidade de néboas costeiras que afectarían a diversos puntos das Rías Baixas. As temperaturas situaranse entre os 17 e os 31 graos con ventos en calma, durante a mañá, tomando compoente norte ao longo da tarde.
A fin de semana ábrese cun proceso de circulación de ventos do nordés. Os ceos continuarán despexados no sur de Pontevedra. As temperaturas situaranse entre os 17 e os 32 graos con vento que soprará forte do nordés.
A partir do domingo 6 de setembro, as altas presións seguirán predominando, pero a masa de aire comezará a ser menos cálida. Os ceos continuarán despexados e temperaturas que iniciarán unha lixeira baixada establecéndose en 17 de mínima e sobre 28 graos as máximas.