O Concello de Pontevedra e o Ministerio de Seguridade Social chegaron a un acordo para evitar que as persoas que soliciten o ingreso mínimo vital, aprobado polo Goberno central, teñan que acudir ao padrón municipal para solicitar un certificado de empadronamento.

Este trámite, segundo o Concello, estaba a contribuír a que este servizo, que temporalmente atende ao público na Casa da Luz, estivera conxestionado.

Ambas as dúas administracións acordaron que fora o propio padrón o que se poña en contacto co ministerio ante calquera solicitude presentada e non sería preciso obter persoalmente ese certificado que emitirá, de oficio, o Concello sen a presenza do interesado.

Para reducir a carga de traballo deste servizo, que tamén se incrementou polas recentes eleccións galegas e os trámites para as matrículas escolares, o Concello decidiu reforzar a súa atención telefónica.

A centraliña está sendo atendida por dúas persoas e as chamadas dirixidas directamente a rexistro e o padrón por cinco persoas. Ademais, para o servizo de padrón creouse unha liña nova específica: 986850337.

Estes dous servizos, os que máis atención ao público proporcionan, volverán ao edificio municipal de Michelena 30 a mediados de agosto e o novo sistema de citas previas quedará implantado no mes de setembro.